دلع نفسك

ان لم تشعر بالاٍشباع الداخلى تماما فلن تكون بقادر على أن تعطى الآخرين و لا حتى لأقرب المقربين اٍليك ..
أرى من الأهمية بمكان أن تولى نفسك قدرا هائلا من الرعاية و الاٍهتمام ( دلع نفسك ) ..
اٍهتم ببهجتك الداخلية و بمظهرك الخارجى ..
اٍحرص على النظافة و التأنق و أستعمل أرقى العطور...
و لا تبخل و أبتعد عن مسببات الغم بقدر اٍستطاعتك ..
كل اٍنسان منا مسئول عن مسرات نفسه بما يرضيه
وفى حدود الأعراف الدينية و الاٍجتماعية تبعا لاٍلتزامات و معايير أخلاقية معينة ..
حين تصل لمرحلة أن تبهج نفسك و تشبعها بالمسرات ستكون مصدرا للبهجة و المسرات لكل من حولك ..
تشع عليهم من فيض روحك المبتهجة بغير حساب ..
عندها لن تشغل بالك كثيرا بمعادلات العطاء و التضحية
فسوف تتفجر بداخلك ينابيع الحق و الخير و الجمال و تفيض على حياتك بدون توقف ..
بصرحة كدة
انا الليلة ااااخر انبساطة

اجمل صدفة

كلنا نسير فى طريق الحياة .......فى كل صوب نبحث عن نصفنا الآخر
لا نعلم من يقابلنا ومن يفارقنا .....ولكن نسير كما ترسم لنا الحياة طريقها...
أحياناَ (ما) يصادفنا أحلى ما فى الحياة...... نلقاه عبثاَ دون اى موعد مسبق
لنكمل سيرنا فى طريق واحد يجمعناَ ...
هكذا (هى) أحلى صدفة قابتلها فى طريق حياتى....
هكذا هى الصدف فى حياتنا ما بين لقاء و فراق .....
صدفة تجمع........ لتبدأ معها حياتنا الآخرى مع من أحببنا...
وصدفة تفرق....فنظل محتفطين بها ذكرى جميلة فى حياتنا......
كانت صدفة..... اجمل صدفة.. ......
هكذا كانت (هى) فى طريق حياتى صدفة جميلة
شاء لها القدر أن تكمل طريقها معى للنهاية.....
لتبقى دوماَ وأبداَ.... أغلى وأعز ما حدث لى بالحياة......
*اليك.....
صدفة...واجمل صدفة
اسعد يوم....يومى اللاقيتكـ
اسعد يوم....يوم الـ حييتك

حالة صعبة

أن يفرض علي الإستذكار ....كي أحقق شيئاَ مآ ...
ولا ادري كيف اعد له.....
ولكنى متأكد..... إن ما سأحفظه ....وأمليه على ذاكرتي ...
لكي تردها إلي وقت الحاجة ....
هو (حجم المخزون الشوقي لرؤيتك)....(وعمق حرارة عشقي لك)....
وأرقاماَ كثيرة من اللحظاتْ والايام التي أعدها حتى يحين لقائى بك....
وجمل وعبارات إنشائية إليك...ووووو
اممممم.....
هل تراني ساتعدى هذا الإمتحان الصعب....

دوام الحال من المحال

نعيش قصة حب جميلة نحس فيها اننا مالكين الدنيا ولامسين النجوم بأيدينا
ومافى احلى من كده ...
وما عايزين حاجة تانى ابدا طالما كنا مع الزول البنحبو...
مع الانسان الذى نتخيل اننا لو بعدنا عنو ممكن نموت !
وتمر الايام وينتهى الحب ويتكسر القلب ونحس بالقهر
واننا ما قادرين نعيش او عايشين زى الميتين
وما متخيلين بكرة حا يجى علينا كيف ...
وكل احلامنا ضاعت مع الانسان الــ حبيناهو واتعلقنا بيهو !
وتمر الايام تااااانى ...
نتذكرالانسان الــ كنا بنحس بيهو لما كنا بنحب ... و(نضحك)..
ونتذكر القهرة الــ حسينا بيها لما ضاع الحب وبرضو( نضحك) ...
مافى حاجة بتبقى على حالا ....وما في زول (ماممكن يتنسى )...
وكلوووو رااااايح (وتمر ايام ..وتتعدا)
سبحان الذى يغير ولا يتغير ...

خواطر

لما بنحب بجد بنلاقي كل حاجة في حياتنا اتغيرت كل حاجه ببقي ليها طعم ومعني ...... حتي الحاجات الــ كنا قبل كدا بنعتبرها تافهه وماعندها قيمة نظرتنا ليها بتتغير ... منو فينا لسة مامتذكر اول جواب جاهو من حبيبو ... ويقعد يقراهو مرات ومرات لما يحفظ كل كلمة فيهو عشان هو حاسى ان روحو فيهو ... انو حبيبو مسك القلم وكتب كل كلمة بشوق جواهو .... منو فينا ما بيتذكر اول حب في حياتو وكيف كان قلبو بيدق جواهو لما كان بشوف حبيبو جاي من بعيد.... منو فينا لسه ما محتفظ بى حاجات كتيييييرة وبيقول انها من (ريحة الحبايب).... لما نحب بجد ....كل حاجه بنتذوقها بطعم مختلف عن كل مرة حتي طريقة لبسنا حتي نغمة الموبايل حتي اسمنا..... ايوه اسمنا ..... كدى اتذكر اول مرة حبيبك ناداك بى أسمك حا تقول انها كانت اجمل مرة اسمع فيها اسمي ... منو فينا ماحلم باحلام كتيييرة كان نفسو يحققا ... احلام بسيطه رغم ان بعضها كان انتحار... الحب حلم جميل في حياتنا لكن..!!! تجي لحظه وتتغير حياتنا تااااااني تتغير 180 درجه لنفس السبب لما الزول البنحبو دا ...والكان هو كل شىء في حياتنا بيقرر انه يرحل عننا ... يرحل بعيد وينسانا ... بنحس فى اللحظة ديك بابشع شعور ممكن زول يحس بيو الم ضيق تعب بعضنا ممكن يستحمل لانو اتعود على الشواكيش والبعض ممكن ما يستحمل ويقتلو الحنين لانو بجد كان بيحب بصدق ولان (بعض الحب يكون الموت) عشان كدا يااااااا كل من لديه حبيب لا تسمح لنفسك ان تجعل من يحبك يموت عشقا....

خواطر

فيه حاجات كتيرة جدا بنستناها تحصل
ونكون مستنين ومستنيين
ممكن تيجي ...... وممكن ماتجي
وممكن نقعد عمرنا كلو نستناها....
وفي ناس بتعرف تتعايش مع الانتظار
وبتلاقي بديل للحاجة المستنياها ....
وناس تانيه بتوقف حياتها كلها علي الشيء
المجهول الاصلاً في عالم الغيب دا ...
وفيه ناس غيرهم كلهم
لما بتمل من الانتظار
بتقرر انها تمشي في الاتجاه العكسي
ضد الحاجة الـ كانت بتحلم بيها
وبتاخد خطوات للخلف
وحتي لما بيجي الحلم الـ كانت مستنياهو
بيكون الرد
( سبق السيف العذل )...(راحت عليك)
يعني بصراحة كدة..

شوف ليك زول تانى..
خلاص شطبنا ...بببببححح

مشهد واقعى جـــــــــدا

بعض البيوت .. بعض الأمهات .. بيعملوا شوية فصول بااااايخة جدا فى عرسان وعروسات بناتهم واولادهم..
وكتير من العرسان (بيطفشو) لمجرد تعنت الاسرة وتمسكها فى اشياء (فارغة....( وقصص كثيرة تحكى عن عريس طفش والسبب ام العروس.. وعريس خلا عروستو والسبب ام العريس ذاتو......
- امى ، فى واحد معاي فى الشغل عايز يقابلك
- خير انشاْْ الله عايز شنو ؟؟

- عريس يا امى أكيد بعنى عايز شنو!!
- عريس؟؟ وده عرفك بتين؟ شكلو كيف؟                                       مرتبوكم؟ عنده بيت وللا لا ؟
اتكلمى ساكتة لي شنو؟؟
- امى انت مديانى فرصة ، قلت لك معاي فى الشغل.. كل العارفاهو عنو انو سُمعتو كويسة فى الشركة.. لكن أى تفاصيل تانية تعرفيها انتى منو....
- يعنى عايزة تقنعينى إنكم ما اتكلمتو فى أى تفاصيل؟!!
- لا لا، كل الحكاية إنو قال لى إنه معجب بيا وإنو عايز يجى يزورنا.....
- ممممم، ولو افترضنا إنى صدقتك.. افرضى ماكان مستعد ماديا للعرس.. حاتوافقى عليو برضو لمجرد إنو سمعتو كويسه فى الشغل !!!
- يا امى إنتى ليه بتسبقى الاحداث؟                                                    ما تقابليهو الأول وقرريه ووقعيه فى الكلام بمعرفتك
- لما نشوف عريسك دا (سبع ولا ضبع(
العريس جا البيت .. وشرب الشاى باليسكويت
طبعا الام ماخلت ليهو جنبة يرقد عليها
- دا عريس الغفلة العايزة تعرسيهو ؟؟                                            ليه إن شاء الله ليه إنتى بايرة ولا القطر فاتك !!!
- مالك بس يا امى، شنو بس الما عاجبك فيو؟
- ما عاجبنى فيهو !! قولى لى بس شنو العاجبك إنتى فيو؟؟
- ودحلال، وود ناس، ومهذب ومحترم                                               يعنى دا على قدر معرفتى البسيطة بيهو
- ودى أسباب قوية تنجح الزواج من وجهة نظرك؟؟                        صحيح ما إنتى لسه صغيرة ما فاهمة حاجة
- قولي لى إنتى يا امى شنو الشروط المطلوبة عشان توافقى عليهو؟
- يابنتى ده قدرك، فاهمة يعنى إشنو قدرك.. يعنى داسبب كفاية إنى أرفضو
- وشنو المشكلة يعنى إنه قدرى!!! هو لازم يعنى يكون أكبر منى عشان يكون شخص ناضج؟؟
- آيوا طبعا، مش أقل من عشرة سنين فرق
- كااااااااااااااااااااااام!!!!
- هو كده يابتى ، أنا مابقبل فرق سن أقل من كده.. عشان يبقى مسئول .. عشان يقدر يحتويكى ويخاف عليكى
- ما أشوف لى (راجل مرة)، عشان تبقى عندو خبرة برضو فى تحمل المسئولية، ومتجرب قبل كده عشان على الاقل يكون متعود على الشقا ..
- انتى بتستهبلى يابت ؟ طيب استهبلى زى ماعايزة ..عجبك عجبك..
ماعجبك اشربى من البحر..
- امــــ ....
- كلمة زيادة حا اديك كف
وطااااااار العريس.....

*************
دى كانت حاجة بسيطة من الحاجات البتحصل ورا كل باب مقفول على اى بت عايزة السترة..
بس يا ترى ويا هل ترى شنو البطرشق العرس من وجهة نظركم، لااااا عليكم الله أوعا تفهمونى غلط ههههههههه

قرب تعال باحمام

قرب تعال ياحمام ( شتت ليك سكر)... اغنية سودانية جميلة ندندن بها كثيرا.. تقودنا الى شئ مهم نحتاجه كثيرا فى تعاملنا مع الاخرين الا وهو (رش السكر على الكلآم)..
هو ذلك الكلآم أحيآناً..ربما يكون باهتا.. شاحبا ..لاطعم له ولا لون...يخرج من أفواهنا بكسل وأحيانا بضجر...
وهنآك كلام جارحا يقطع أوصآل المحبه... يسم البدن... (ويفقع المرارة) كما يقولون..
عندما يكون احبتى أغلب الكلام سآدة( لا لون له ولا طعم ولا حتى رائحة)...لآيترك صدى فى النفس...
ما احوجنا الى ( رش الكلام بالسكر)...واذا كان الكلام ( الشين )يصنع لك .. عدوا ...فان الكلام ( الحلو )يصنع لك الف حبيب..ألسنآ بحآجةٍ لأن يصبح لكلمآتنآ طعم ونكهه... ورائحة ولون ... لماذا لا يكون كلامنا ( طاعما)..يربك الاذن بجماله...فنذيب الأحرف بقطع من السكر...
لتثلج قلب الأم بالكلام الحلو... ليبتهج الاب بكلماتنا ( الطاعمة )... وكذلك الاخ ... الصديق...
ليسعد الزوج( بالكلمة الحلوة)..ولتسعد الزوجة ( بمعسول الكلام )...
فقط علينا ان نجعل كلامنا حلوا مستساغا مع من حولنا.. فلنرش السكر على الكلآم... ونجعله ( طاعما)...
ودع غيرك يستمتع بارتشآفه....وحلآوته تدآعب قلبك...علم شفتيك أن تتمدد تتذوق السكر من لسانك...
علم لسانك ان يكون ( حلو المذاق)..لجميع من حوله..
فقط كن صآنعاً السعآده...رش السكر على الكلآم..والكلمة الحلوة تأسر القلوب ...وتذهب الجفاء ... وتذيب الضغائن والبغضاء...(والكلمة الحلوة )... جواز سفر للقلوب... ما احوجنا لان يكون كلامنا حلوا طاعما ..( مرشوشا بالسكر)..
وقرب تعااااااال ياحمام ... شتت ليك سكر..

انا منتشى

 

فيها شى
لو قلت ياناااااااس
انا منتشى...
مابختشى لو انتشى...
حاس بالفرح غمر الديار
والدرب الصِعب
لى من زمااااان
بقى بتمشِى...
جواى شى
خلانى مبسوط منتشى
لمن كراعى من الفرح
ابت المشى...
ولا العيون زى ال تقول
كان فيها شى...
انا منتشى
ما الدنيا دى
مافيها شى غير تنتشى
بس منتشى..
حاجة خارج النص
ست الودع
ارمى الودع
كشكشى
شوفيهو لى
كان فيهو شى
ماتختشى

كـــــــــــامل الاوصـــــــاف

 
بنسمع كتير من بنات اليوم العازبات عبارة يشكون فيها من ندرة الشاب المحترم الجدير بخطفهن من بيت عائلتهم وهي عبارة بتخبي وراها البنت قلقلها من استعجال قطار الزواج الذى يمر أمامها كل يوم ويخطف العديد من صديقاتها وهي واقفة بتتفرج..
مش كده بس ..بقينا بنسمع البنات بقلولو في مجالسهن الخاصة جدا أنو "خلاص شطبو" ، طيب يعني شنو شطبو يا بت ؟!..تقوليك يعني خلاص الشباب الطيبين الممتازين عرسوا وراحت فرصتنا..!!
الأعجب من كده هو ان البنات حديثي الزواج يشكون بالحاح شديد من "رذالة" أزواجهنّ ..الكانوا في الاساس طيبين وممتازين و"خلاص" طلعو من سوق الرجالة وأصبحوا عملة نادرة بحسب تقدير البنات العازبات..!
وفي تقديري المتواضع انه بطبيعة الحال لا يوجد على الإطلاق رجل طيب وممتاز بالمطلق في هذا العالم..ولا توجد بالضرورة كذلك فتاة كاملة الأوصاف تثير في روحك الإنتعاش في غدوها ورواحها..وإنما يوجد فتاة وشاب يستطيعان الاتفاق على قدر كبير من السمات الطيبة المشتركة بينهما..ويتقاسمان القدر الآخر من الرذالة إن وجدت..!!
وزى ما بقولو...
ولدك على ماتربيه...
وراجلك على ما تطبعيه
وبرضووو كمان بقولو....
ولدك على ماتربيهو... ومرتك على ماتعودا

صبــــاح الـــــورد

   

صباح الورد
لشبه الورد
صباح ناعم ...صباح جنة
وورد خدود بيتحنى
ودعوة صافية من قلبى
بان يا حبيبى تتهنى ...
صباح ياسمين على عيونك
لون الفجر من لونك
يا ساكن مساماتى
و قلبى حرير و مجنونك
صباح اخضر زى قلبك
عيون صافية وبتبادلك
حنين بى حنين
وكلمة بقولا مشتاقين
جد والله مشتاقين  

بـــاى بــــاى

    

اتعودت اسمع اسمك كل يوم
دحلت فى حياتى بشكل مريب..
بشكركـ جدا على كل لحظة حلوة عشتها معى
ماعارف بجد ...ازعل عليك وانا بودعكـ
ولا افرح ...وأنا بسيبكـ وارحلـ
اتحترت فى تناقضاتكـ...
مرة كويس...ومرة كعب
خايف جداً اكتشف انكـ كنت حنين جداً معاى
اكتر من اى حاجة تانية...
عموماً انا خلاص.. استعديت لوداعكـ
وأقلمت نفسى لحاجة غيركـ
ومستعد ما اشوفكـ تانى...
ماعارف انكـ كنت نقطة بداية ستمنحنى دافعا
ام مجرد حاجة عابرة فى حياتى..
ماعارف بالظبط اوصفكــ
حنين...لطيف...
ولا غليظ...وووو
عموما مافارق معاى أصلاً
لانى قررت خلاص...اسيبكــ
وأشوف غيركـ..
ما بسأل منك تانى..
وياريت كمان ما ترجعنى تانى لى ورا
مع السلامة...
اقطع وشكـ ...
خلاص ياشهر سبتمبر...
أفتح الطريق لى شهر اكتوبر

عروس ديليفرى

 

الأخو صاحب الإعلان يوفر الزوجه الثانيه
ياربى الزوجة التانية دى بى شيلتا وريحتا ولا ساااى
وبيوصل الإستمارات للمنازل !!!!!
لكن ماقال لينا... معاها سلطة وكتشب ولا لا؟؟

 

 

انسانة من زمنا محال

ياسلام لو شفتها..
فى لحظة تعرف اِنها..
انسانة غير كل البنات..
ياسلام لو عشتها..
موسوعة كاملة من الصفات..

ياسلام لو تبتسم..
والله بس سُكر نبات..
حاتدهشك... من روعتا
وتحيٌرك...فى ضحكتا
وتوقفك... فى مشيتا
وتنومك... من همستا
وتذوبك... فى رقتا
وتعطرك... من ريحتا
وتسكنك...فى دنيتا
وحا تدخلك ... من لحظتا
ياسلام لو شفتها..
انسانة.. زى عبق الزهر
نديانة ..زى زخ المطر
نسمة صباح والدنيا حر
غيث.. واِنهمر
عز الجفاف..
وردة فى أجمل ضفاف ..
من هيبتا..
تحلف تقول أصعب منال ..
ومن طيبتا..
تلقاها سهلاً ممتنع
حاتسحرك..سحراٌ حلال
وتسكنك .. سابع سما
وتقربك.. من الكمال
انسانة من زمناً محال
انسانة قطعة من الحسن
والله اية من الجمال
******

7/10

نـــــــــقة فى نقــــــــــة

ماكلف نفسو يسالا عملتى شنو عند الدكتورة
رغم انو عارف وحافظ
انو الليلة المقابلة الشهرية
وهى منعا انها تحرق فى دمها
كبرت راسا وقالت فى سرها
حا اقول ليهو من غير ما يسالنى
ولكن بعد لحظات قررت
انها ترجع فى كلامها
وقالت فى سرها ...
(والله اصلى ما اقول ليهو)
عاين ليها وفى عيونو سؤال
فرحت وقالت اكيد حا يسالنى الدكتورة قالت ليك شنو..؟؟
وفعلا سالها.... وقال ليها..
جبتى الصور بتاعتى من الاستوديو؟
عاينت ليهو بى استغراب وحيرة...
وهزت راسها غمضت عينيها وفتحتن وقالت ليهو قلت شنو؟
كرر سؤالو بحدة..
جبتى الصور بتاعتى من الاستوديو؟
سالتو صور شنو ياراجل ؟
قال ليها انتى مش كنتى عند الدكتورة؟
قالت ليهو ااااي
قاليها طيب ما كان تغشى الاستوديو معاك
عشان تجيبى الصور بتاعتى
موش الاستوديو جنب العيادة؟
حست بوجع فى مصارينا وراسا لفة
وبلعت ريقا ... وردت بهدوء محزن
اسفة معليش نسيت ..
دخلت جوه الاوضة وطنطنت
اففففففف...دى حالة دى

**********

اول ما جا داخل البيت
علت صوتا وقالت ليهو
عليك الله امشى براحة وانت داخل
الشافع دا يا دوبو نام..
ولو صحيتوا انت ال حاتنومو تانى
قال ليها بصوت هادى
السلام عليكم..
قالت ليهو وعليكم السلام ... سمعتنى قلت شنو؟
قال ليها بصوت هادي
انا صوتى اوطى من صوتك
الشافع لو صحى حاتصحيهو انتى بى كواريكك دى ...
قالت ليهو وهى بتلوح بايدينا..
ياخ عليك الله كدى...!!
عليك الله خلينى انكمل البعمل فيهو دا..
قال ليها انتى بتعملى فى شنو ؟؟
قالت ليهو ماشايفتى بتحنن ..
قال ليها طيب الجوع كاتلنى
طبختى لينا شنو الليلة؟
قالت ليهو..فى موز وبطيخ فى التلاجة
انا الليلة ماسويت الملاح
من الصباح الليلة فى حنتى دى
قال ليها الله غالب حكم القوى على الضعيف
خلاص بطيخ بطيخ امرى لله خلاص قومى جيبيهم
قالت ليهو بى نهرة..انت ما شايفنى بتحنن
ماتقوم تفتح التلاجة وتشيلهم براك..
يمشى يفتح التلاجة ويشيل ليهو موزتين وحتة بطيخة
ويطنطن ... اوفففففففف دى حالة دى

شاكوش جــــامد

غابت عنه اسبوعا كاملا
مافى لا تليفون ولا حتى رسالة
ولا اى حاجة تطمنو عليها
والزاد الطين بله انو لازم يسافر فى مهمة عمل
ورحلته العمليه ح تخليه يغيب ثلاث اسابيع تاني
قبل ما يسافر واثناء استعداده للسفر
حاول الاتصال بها اكتر من مرة
وتليفونها مغلق دائما (لايمكن الوصول اليه حاليا)
كان كل قلقه ان يكون حصل ليها حاجة
او تظهر فجأة وتعرف انه سافر من غيرما يقول ليها
بعد مارجع من رحلته العملية
وبعد محاولات عديدة للاتصال بيها
قرر انو يمشى ليها فى مكان عملها
ويشوف الحاصل شنو...
طول مشواره الى مكان عملها كان يفكر
ويقول اللهم اجعله خير اللهم اجعله خير
اخيرا وصل ..شاف عربيتها واقفة فى (باركنق الشركة)
تنهد وارتسمت ابتسامة خفيفة على وجهه
دخل الى استقبال الشركة..
وسأل موظف الاستقبال..
(.........) موجودة..؟؟
اجابه الموظف.. موجودة ..
دى يادوووب نزلت الشغل الليلة
اصلو اجازة زواجا انتهت واول يوم تجى الشغل
ممكن اقابلها..
اتفضل عارف مكتبها وين
ايوه عارف... موش الطابق الرابع
وفى طريقه للاسانسير كان ماشيا وهو شبه مغيب عن الواقع
استغرب الكلمة وقعد يكررفيها اكتر من مليون مرة
اجازة زواجا..!!
ااجازة شنو..؟؟
معقووووول..؟؟
!!!!!!!!!!!!!!!!!
ويقنع فى نفسو اكيد سمع بتاع الاستقبال غلط
اكيد قال كلمة تانية تشبه زواجا
يمكن يكون قال زواج اختا
كدة ممكن ..
على الاقل اختها مخطوبة ويمكن كملت مراسم زواجا
لكن زواجا دى كلمة ما مفهومة
وبعدين يعنى شنو زواجا؟
زواجا كيف يعنى؟
طيب الدبلة اللابسا فى ايدى دى تبقى شنو؟؟
اصلو ما ممكن تكون اتزوجت وخلتنى..
انا خطيبا ... وكمان متفقين نتزوج بعد سته شهور
بتاع الاستقبال دا اكيد قال زواج اختا
مش زواجا هى...!!
دارت كل هذه الحوارية فى فكرة فى دقايق بس
اتحسبن.. واتحوقل..واستغفر
وعند باب الاسانسير لقى ورقة كبيرة معلقة مكتوب عليها
عذرا الاسانسير عطلان
وقف عند اول درجة من السلم
وعاين لى فووووووووووق
وقال مافى مشكلة
امشى بالسلالم والبيحصل يحصل
انشالله نفسي يتقطع
بعد طلوع السلالم
وبعد قطع الانفاس
وبعد ما وصل الطابق الرابع
قعد فى السلم عشان ياخد نفسو
كدى النحاول اتصل..
يمكن يكون تلفونا مفتوح
ااااااخ..(عفوا هذا المشترك لا يمكن الوصول اليه حاليا)
اتوكل على الله ...
دق باب المكتب..
تأهب للدخول.. ومنتظر انها تقول ليهو اتفضل
الله....مادايرة تفتح الباب ولا شنو..؟؟
استغرب ودق الباب تااانى
سمعا ببتكلم بالتلفون ..
ضحكات عالية وهمهمات
عاين بالعين السحرية
داير يشوف الحاصل شنو..
اللللله... دى بتتكلم بالموبايل
استغرب جدا جدا
طلع موبايلو... حاول يضرب تانى
(عفوا هذا المشترك لايمكن الوصول اليه..)
وطيب دا شنو التلفون الشغال دا..؟؟
عاين تانى من العين السحرية
اصلو ما معقول..!!
ناقشة الحنة فى ايدينا !!
وعاملة ميك اب بتاع عروس !!
حس بى راسو لف
بدا يسترجع كلام بتاع الاستقبال
اجازة زواجا..!!
بدأ يصدق فعلا انها اتزوجت
بدا يحس فعلا انها تركته للابد
فعلا شم ريحة (الخمرة وهى تملا مكتبها)
احس بدوار عنيف وراسو عايز يطير
وقف قدام عتبة السلم
قعد على الواطة
دمعة سالت من خده
طلع منديله..مسح دمعته
قرر انو خلاص يمشى البيت
حس انه محتاج ينووووووم
ينووووووووووم
ينوووووووووم
يصحى على صوت تلفونو
نفس النغمة المخصصها ليها
(وبحبك وحشتينى)
عاين لى التلفون..
حبى.... يتصل بك
يدعك عينيهو ليتاكد
قرر انو يقتح المكالمة..
الو ..الووووووووو
رد باستخفاف وفتور.. نعم
قال ليها حمدلله على السلامة
مبروك الزواج..
تسكت ...
يسالها بسخرية
واخبار العريس شنو..!!
تقول لبهو افهمنى بس
والله جبرونى اهلى
يقاطع كلاما
و يتنرفز ويقول ليها
كفاية كفاية
تقول ليهو ممكن اقابلك افهمك الحاصل شنو
قال ليها.. خلاص ما عايز افهم .. وماضرورى افهم
تبكى وتترجاه انو يسمعا
وهو يقاطعها.. انسى الحاصل
اكدت له انها لا زالت تحبه
ضحك بصوت عااااالى
كدى عليك الله انسى ..
(حب شنو العايزة تقوليهو لى دا)
قفل المكالمة .. وهو مستغرب جدا
يعنى انا اخدت شاكووووش
معقووول..!!
معقوووول..!!
بالبساطة دى تبيعنى
بعد كل العملتو ليها...
التلفون يرن... ترررررررررررن
نفس النغمة...يدوس على (رفض المكالمة)
تااانى يرن...وبرضو (رفض المكالمة)
قرر ان يغلق تلفونو
وقبل ان يغلق الموبايل
يرسل ليها رسالة
يكتب فيها
(ماكان العشم)
قرر ان ينوم بعمق..
وقال لنفسه..
ما كل حب بينتهى .. معناتو الحياة انتهت..

غرابة الـــحب

اغرب حاجه فى الدنيا الحب..؟؟
ولا اجمل حاجه فى الدنيا الحب..؟؟
تقريبا هو اجمل حاجه فى الدنيا
لان اى شىء بنحتاج ليهو
وبنحتاج اننا نحسو بنلقاهو فى الحب
ومع ذلك هو اغرب شىء فى الدنيا....
لان اى شىء جميل العيون بتتعود عليهو
ما حا تكون فيهو لذه الانبهار
قدر الشىء الغريب عشان كدة
الشىء الغريب دايما أجمل..







هو : بحبك
هى : وانا كمان يا اكتر اخ حنين فى الدنيا
هو : بحبك يا اختى ويا حبيبتى ويا أمى ويا كل حاجه حلوه فى حياتى
هى : بإستغراب شديد ... ربنا يخليك
هو : معقوله ما فاهمه..؟؟
طبعا هى بتحاول تتغابى عليهو عشان مامكن تدخل
فى علاقتين فى وقت واحد (لانها مخطوبة)....
وكمان هى ما متأكده انها بتحبو بدرجه اكتر من حبيبها وخطيبها الاختارتو
هى : لا ما فاهمه والله... ممكن توضيح اكتر...؟
هو : صراحة ما لاقى حاجه اقولها اكتر من انى ماعايز ابعد عنك ابدا
وأفضل دايما اسعدك وانتى جمبى وعاوزك ليا يا احلى شىء في حياتى ...
قلت ليك بحبك ... بحبك اكتر من نفسى
هى : انت فاجئتنى بالكلام دا .. انا صراحة انا مستوعبا الكلام دا..
معقوله انت بتحبنى الحب ده كلو
هو : واكتر من ما تتخيلى كمان ..
انتى ما تتصوري انا قدر شنو بتغاظ لما بتكلمينى عن خطيبك ..
هى : باستغراب..!! انت البتقولو ده مستحيل اصدقو..
انا عمرى ما حسيت بأى حاجه ناحيتك اكتر من انك صديق مميز وأخو عزيز..
وعمرى ما تخيلت ابدا انك تقول لى حاجه زى كده ..
انت شنو الخلاك تقول كده
هو : الخلانى اقول كده انى خلاص مسافر وداير صراحة اوريك الاحساس الجواى تجاهك
انا فكرت مليون مره قبل ما اصارحك ولقيت انو لازم اصارحك بالجوايا
لانى خلاص ماقادر اخبى اكتر من كده ..
وانتى لازم تفهمى انى خلاص ماقادر اسكت ولا اتناسى حبك
هى : سكووووووووت تام
هو : انتى ساكته ليه.. مستغربه انى بحبك وعاوزك ليا
هى : انا ماعارفه اقوليك شنو.. ولا عارفه اعمل شنو!!
طيب ممكن نتكلم فى وقت تانى..
كررررررررج..تيت تيت تيت
هو : ألو ألوالو الو الو
انتهت المكالمه وبسرعه فتحت تليفونها وطلعت الشريحة منو وكسرتها ..
وقررت انها تهجره للأبد بالطريقه الوحيده الكان بتواصل بيها معاها
وبى كده هى هجرته احسن من ما تستمر معاهو فى سبيل رضاهو
وفى الاخر برضو حا (تديهو شاكوش)
وطبعا اللحظة ديك الجرح حايكون جرح تتربيع!! ..
طيب..بعد الكلام دا كلو.!!

الحصل دا ذنب منو...؟
هى... ماعندها ذنب فى حاجه عشان هى ما قالت ليهو تعال حبنى للدرجه دى..
او حبنى أصلا لانها فعلا بتحب زول تانى وكمان هى شايفه مع انو العملتو جارح جدا
بس ح يكون احسن وعشان كده نفذت القرار بسرعه شديدة
وهو ... ما عندو ذنب عشان قلبو ما مستنى
يقوليهو حب (فلانة )وخلى (فلانة)
طيب منو العندو ذنب
فى الحصل دا ..؟
.
.
.
فعلا اغرب شىء فى الدنيا الحب

فداكـ ابى وامى يارسول الله

 

فــــــــــــداكـ ابى وامى يارسول الله

بلغ العلى بكمـــالـه كشف الدجى بجماله

حسنت جميع خصالـــه صـلـوا عليـه وآلـه

ورحم الله ابن الفارض حيث قال

وعلى تفنن واصف يفنى الزمان وفيه ما لم يُوصَفِ

اللهم صلى وسلم وبارك على سيدنا محمد

وعلى اله وصحبه وسلم