قصيدة لأمى

بجيك (يمه)
وأختك واجهة في دفتر كتاباتي
وبي حبر الهوي الفيني
أخط اسمك....
احسك عافية في جسمي
وساعة الزمن يقسي....
وعلي الدنيا تبقي ظلام
يكون بسمك..
حنانك (يمة) غامرنا....
بسيماتك
غنيواتك
ديمة سامرنا.....
ودعواتك في نص الليل
مطر صب ويجود بالسيل ..
وقهوتنا الصباحية
تزيد فينا الامل جملة..
من بحور ريدك
نشيل نملأ...
اريت يايمه لو اقدر
اجيب ليك القمر هسة..
اجيب النجمة تلو النجمة..
وارصرص كل صباحاتي
وافرش ليك الورود مرسي..
واطرز ليك من الآمال
وراحة البال
وستر الحال
دوام لبسة
وفي كل عيد
نجيك نحن ونبارك العيد
ونعزف ليك احلي نشيد
نشيدك انتي (يايمه)