دراما ولا احلى

قاعدة على سريرها فى غرفتها
بتقرا فى رواية (قصة حب)
قعد جنبها من غير سلام ولا كلام
وبدون اى مقدمات
قعد يحكى ليها عن مغامراتو
ويشرح ليها خططو المستقبلية
ختت كتابها على التربيزة
التفتت اليه وعاينت ليهو
فى اهتمام مصطنع من جانبها
وسرحت فى كلامو
وطريقة عرضو
سرحت فى لون عيونو
سرحت فى تعبيرات وشو
سرحت فى حركات ايديهو
سرحت فى شفايفو
(عايزة بوسة)
نطقت بطلبها
ما هسى...!!
رد سريع وحاسم من جانبه على طلبها
سكتت وسرحت تانى
وعلى وشها اترسمت ابتسامة
واستمر هو فى حكاياتو
ومحاولاته المتكررة انو يشرح ليها وجهة نظره
اعتقاد دائم منه
انها ما حاتفهمو بسرعة
وهى سرحت فى ملامحو
وعنيها على شفايفو
وهى بتتحرك بكلام ماعندو اى معنى
لكن من وجهة نظرها اكيد ده احلى كلام..
(طيب ادينى بوسة)
طلب تانى قالته بيأس..
استنى لما اكمل كلامى
رد اخر حاسم وقاطع من جانبه
واستمر فى حكاياته وخططه وشرحه بحماسة عجيبة
وهى اتكبست تانى واتكتمت وسرحت
أها رأيك شنو ؟
سؤال من جانبه
خلاها تفوق من سرحانها
قالت ليهو كويس..
ابتسم ابتسامة رضا عن انجازاته التى لاقت قبول عندها
قام من جنبها ومشى على اوضتو
ناداها..
تعالى هنا..!!
التفتت مستغربة
و سألها عايزة شنو؟؟
قالت ليهو...
(انا عايزة بوسة)
عاين ليها وابتسم وهز راسه بحركة معناها
امرى لله انا عارف انها ما حا ترتاح الا تشيلا منى
وقاليها .. معليش نسيت
وطلع فوق السرير
(واداها بوسة )
وهى بحنانا المعهود
ادتو عضة فى خدودو
هو زعل منها
اهاااااااا
شنو ياماما كل مره اديك( بوسة)
تقومى تعضينى فى جضومى..!!
انا زعلان منك وما حا اخليكى تلعبى معايا
نزل من السرير ومشى يلعب براهو
وهى ضحكت ..
ومسكت كتابا تكمل القصة
ولسان حالها بيقول
الولد دا انا بريدو ياناس...