تخيلو الزواج بعد عشرة سنوات فى ظل ادمان الشباب على الانترنت والمنتديات والفيس بوك
حا يكون كيييييف.. كدى خلونا نتخيل كدة (رامى) عايش قصة حب عنكبوتية مع (سوسو)
وقرروا الانتين يضعو حد للـ chating لى انصاص الليالى والتسكع طول اليوم فى غرف الدردشة والمنتديات..
(رامى ) اخد موعد مع سوسو انو حايجى يزورهم فى البيت عشان يخطبا...
اليكم هذا الحوار الخيالى بعد ان زار العريس بيت العروسة..ودار الحوار بين رامى وابو سوسو
رامى : ازيك ياعمو ماعرفتنى اكييييد
ابو سوسو: لا ياابنى ماعرفتكـ كيف حكو لى عنك كتييير ماقصروا
رامى : انا والله ياعمو خلاص قررت اخطب ويسعدنى جدا اطلب ايد بنتك
ابو سوسو: اها يا ابنى انت شغال وييين
رامى : والله ياعمو ان شغلى عندو علاقة بالانترنت وكده
ابو سوسو: والله كويس مصمم انترنت يعنى؟
رامى : لا ياعمو مامصمم صفحات انترنت
ابو سوسو : طيب معناتا مبرمج شبكات ؟؟
رامى :والله ياعمو انا حاليا شغال مشرف قسم الاغانى فى منتدى
ابو سوسو : اها انت بتشتغل شنو ؟ يعنى مشرف لى شنو ؟
رامى : والله ياعمو شغلى كلو انى انزل مشاركات واغنيات وملفات
واسجل بى اسماء مستعارة عشان أحرك المنتدى وكدة
ابو سوسو : اها يا ابنى يعنى بدوك كم كدة ؟؟
رامى : لا ياعمو انا بدفع ليهم حاليا عشان يبقونى مشرف
ابو سوسو: بى استغراب والله يا ابنى انا مافاهم اى حاجة
رامى :لكن ياعمو انا جاتنى فرصة انو اشتغل برضو مشرف فى قسم مسلسلات تركية
وانشاء الله خططى المستقبلية ان حا اعمل لى منتدى خاص...
ابو سوسو : طيب كويس اها ومقرو حا يكون وين يعنى منتداك الخاص دا
رامى : طبعا فى البداية مقروا حا يكون فى البيت لحدى ما الموضوع يتطور وكده
ابوسوسو :يتطور كيف يعنى يا ابنى
رامى : والله حا ادعو ناس كتيرين للاشتراك بالمنتدى وحا ادفعليهم قروش كمان
وبعد داك اعمل لى رابط للمنتدى فى الفيس بوك ومنتداى يبقى مشهووور وحا تجينى اعلانات كتيرة
وحا ابقى زول عندى قروش وممكن افتح لى كم منتدى كده
ابو سوسو : اها انت يا ابنى عندك قروش خاتيها للزمن يعنى ؟؟
رامى : والله فى الحقيقة ياعمى ماعايز اخبى عليك ...
نا عندى 99 دولار فى حساب قوقل متى ماطلبتها منهم
حايرسلو لى الشيك وعندى قريب التلاتة الف نقطة فى موقع بتعمل ليها قريب الـ 50 دولار
ابو سوسو : اللهم طولك ياروووووووووح طيب يا ابنى .. بتى دى عرفتها وين
رامى : والله ياعمو سوسو دى
ابو سوسو مقاطعا : سوسو دى منو كمان ؟؟؟
رامى : هههه سوسو ياعمو دا (اسم التسجيل بتاعا فى المنتدى)
ابو سوسو : اهاااا طيب واصل خرقت لى روحى
رامى : والله اتعرفت عليها ولقيتا بت راااايعة واضفتها عندى وبقينا نتواصل
ابوسوسو :والله !! البت المفعوصة دى كمان بقت تتواصل من ورانا
رامى : والله ياعمو صراحة مشاركاتا حلوة ومميزة .. تخيل فى شهرين بس بقت عضو مميز
ابو سوسو :والشرر يتطاير من عيونو ... اطلع بررررررررة
لو ماطلعت فى خلال عشرة ثوانى انت عارف حا اعمل فيك شنو؟؟
رامى بضحكة : حا تسجل فى الفيس بوك وتكتب على الحائط بتاعى وتنبذنى وتبلغ الادارة عشان يحظروا حسابى
ابو سوسو : برررررررررررررررررررررررررة
رامى : باى ياعمو ... فرصة سعيدة
ليست هناك تعليقات:
إرسال تعليق